429

૪૨૯ - નવીન વર્ષ

૪૨૯ - નવીન વર્ષ

	સવૈય એકત્રીસા
	કર્તા: કા. મા. રત્નગ્રાહી
૧	જો આજે જે સાલ ગઈ ગત કાળે ગણના તેની જાણ,
	નવીન વરસ બેઠું છે આજે, પ્રથમ દિવસનો પ્રગટયો ભાણ;
	અતિ હર્ષે પ્રભુ પાય પડીને દીન મને યાચો બહુ વાર,
	સુખદ, સરસ, શુભ આશિષ દે તું નૌતમ સાલે, સરજનહાર.
૨	જૂનું વર્ષ ગયું તે સાથે જાઓ જૂનું જે અમ માંય,
	નવીન વરસમાં નવીનપણાએ અમથી કૃતિ શુભ થાય;
	આત્માનું અજવાળું આપી, તિમિર તમામ કરી સંહાર,
	સુખદ, સરસ, શુભ આશિષ દે તું નૌતમ સાલે, સરજનહાર.
૩	સુવાર્તાના સેવકમાં બહુ આતુરતા ને હોંસ વધાર,
	વધામણીની વાતો વદવા બળ દઈ ખુલ્લાં કર સહુ દ્વાર;
	ત્રાણપ્રભાકર પૂર્ણ પ્રકાશે અંધારામાં ઠારો ઠાર,
	સુખદ, સરસ, શુભ આશિષ દે તું નૌતમ સાલે, સરજનહાર.
૪	આ ભૂતળના બહુ ભાગોમાં અંધારે વસનારા જેહ,
	ઈસુ પાસે શીશ નમાવી અજવાળું સહુ પામે તેહ;
	સર્વ જનોમાં ગીત ગવાએ, થાઓ ઈસુનો જયકાર,
	સુખદ, સરસ, શુભ આશિષ દે તું નૌતમ સાલે, સરજનહાર.