457

૪૫૭ - ભક્તિઘરનું અર્પણ (પ્રાર્થના)

૪૫૭ - ભક્તિઘરનું અર્પણ (પ્રાર્થના)

	શિખરિણી
	કર્તા: સિમોનભાઈ ગણેશભાઈ
૧	અમે બાળો સંધાં નમન મનથી આજ કરતાં,
	અહીં આવ્યાં આજે તમ સદનમાં પાય પડતાં;
	પિતા છો પ્રેમી ને નિજ શિશુ તણી ખોજ કરતા,
	હરી પાપો, શાપો, સતત સુખના ભોર ભરતા-
૨	મળે માફી માટે ચરણ ધરવા કાંઈ જ નથી,
	અમારાં કામો કે અબળ તનમાં કૈં બળ નથી;
	જડાયો થંભે તે અનુશય વિના ના વળ નથી,
	જિવાડો ત્રાતાજી અમ અધમમાં જીવન નથી.
૩	તમે આપ્યાં છે જે નિશદિન બધાં દાન વરવાં,
	અને બાંધી અપ્યું ઘર સરસ આ ભક્તિ કરવા;
	તમે આપ્યું તે સૌ તન, મન, બધું પાય ધરિયે,
	પિતાજી સ્વીકારો તવ સ્તુતિ તણાં ગાન કરિયે.
૪	રિબાતાં હૈયાંના જખમ દ્રવતા તે રૂઝવવા,
	દબેલા આત્માને ભયરહિત ને મુક્ત કરવા;
	વહાલા સ્વામી તેં જળ, વચન ને રુધિર થકી,
	કલિશિયા સ્થાપી છે પતિત જનનું તારણ ચહી.
૫	હવે તો થંભેથી વિરલ જળનું સ્નાન ધરજો,
	પવિત્રાત્મા રેડી હ્રદય શુચિતા રોજ કરજો;
	વસી વાસો સાથે નવ સરજને પ્રાણ પૂરજો,
	અને સત્યાત્માથી ભજન કરવા ભાવ ભરજો.
૬	વળી વિશ્વાસીનાં દુ:ખ, દરદ, ને શાપ હરતો,
	અને સૌ આત્માના વિમલ પથમાં તેજ ભરતો;
	જગે સાક્ષી દેવા વચન વદતાં સાથ ધરતો,
	પિતાજી દેજો એ અચળ અમને પ્રેમ ઝરતો.